20030821

雲南遊記 23 Aug 2003

(這篇遊記是表弟Alan寫的,而相片就是我拍的,文字在未經同意下巳放在我的網頁裡,哈哈)



~雲南之旅~
麗江 瀘沽湖 香格里拉 大里 昆明


2003年8月23日一行6人 5男1女展開我們今次的旅程,10天旅行團出發了

團員 : Alan 表哥 表嫂 基哥 康仔 勤


第一天

香港家中--皇崗口岸--深圳機場--麗江

今次真係飽哂 凌晨4點幾要起身 因為要坐8點半飛機去麗江 咁早火車都無得坐 好彩而家皇崗24小時通關 如果唔係都唔知點算 5點半到就去到皇崗了(天都未光呢...慘...) 分兩台的士去機場


去到機場發生趣事 我地去到機場 發現一個人都無既 行李車又鎖住哂 好冷清 邊有機場係咁咖 嚇死 原來係我地太早 我地係第一班到達機場的人 餐廳都未開門呢 哈哈

跟住仲有大把時間 去飲下茶先 我地唔俾自己食咁多野 亦唔俾同伴食 因為我地去飛去麗江機票好貴(個時去麗江機票無折 而家有呀...灰...) 諗住上飛機食番佢幾個飛機餐 如果唔係真係氣難下 $1580 太過份 點知上到飛機 得NUTS 面包 飲品 激到我地彈起

差不多三小時飛機我們踏進了麗江 麗江給我們第一個感覺 咩機場黎咖 咁簡陋既 落機唔駛扮手續無人理我地既 步出機場 發現落住毛毛細雨(8月係雲南既雨季) 突然有人問我地係唔係出市區 我地梗話係啦 跟住就上左VAN仔 $10一位 印象中都好似要坐成個鐘先去到市區 路邊見到好多向日葵 好靚 耐唔耐見到一些婦女穿著民族服裝 個時覺得好得意 好特別

在車上有幾個西裝友向同車既人推介行程 我諗係旅行社派黎既 可能見我地年青人都唔會show佢地 佢都無sale我地 一下子就去到麗江市了 感覺普通大城市吧了 之後就打的去古城啦 落到車 古城真係古城 感覺唔錯 陽光幾好 小橋流水 very good 哈 跟住咩都唔知

入左古城無耐 見到什麼旅客中心 梗係入去問人啦 出發前大家都做左些資料搜集 都搵左幾間客棧 咁就去睇下 大致上都可以接受 不過有些toliet會有異味 我地見原來咁多客棧 咪唔理間間睇下 問下價錢 最後去到一間叫金虹客棧 $80 雙人標間 環境唔錯 細細地 唔多人住 靜靜地 係度做room service的又後後生生全女仔 toliet 無異味 唔諗啦 就呢度啦 就咁我地就安頓左係呢間金虹客棧 大家休息左一陣 就出去古城行下 食番個下午茶先 叫左幾個過橋米線大家share 最好去左古城既望古樓 亦係木王府門口影左幾張相 咁就入黑了 入黑左既古城又有另一番風味


*麗江古城


*古城的納西族女人


為左慶祝我地旅程第一日 所以要好好食番餐 我地就去左四方街旁既洋人街 食餐好既 點知 我地係食西餐(番大陸食西餐 搞錯哂) 有pizza 意粉 漢堡包之類 當然要啤一啤去啦 坐係柔和既燈光下 小河旁進食晚餐 真係溝死女 哈哈 食完飯大家買定些面包 準備聽日玉龍雪山之旅 之後就番客棧休息休息了



第二天

玉龍雪山


第一天時已經透過客棧幫我地包車今天遊玉龍雪山 晨早起床 落住雨 好苦惱 都唔知應唔應該改行程 點都好食左早餐先算 前一晚同客棧妹妹仔講好左 $5 一位 有粥 雞蛋 曼頭 ($5 算好抵啦) 食飽飽之後經過女師傅的意見後決定繼續行程


踏上雪山 女師傅問我地駛唔駛買氧氣 因為上到雪山海拔三千幾米 可能會有缺氧程況 我地討論之下 決定買一支啦 大家咁後生應該頂得住

玉龍雪山最深刻既就係枆牛坪同雲杉坪 由於第一次騎馬行山路上雲杉坪 真係驚驚地 行成個鐘
呀 我地6隻馬 得兩個人睇住我地 有咩事點算 一路大家都好緊張 天又下著毛毛細雨 真係好玩非常 騎左成個鐘終於去到了 好涷 可能真係係海拔三千幾米啦 好大霧 見到山 有些白色 唔知係唔係雪呢 跟住我地就不停影相啦 係山下拎支水出黎 扮下華仔道地廣告先 (華仔都係係玉龍雪山拍的) 可能真係高山問題 大家又跑得快 大家都有扯蝦既感覺 因為時間緊迫逗留左一陣我地就走左 跟住當然係騎番馬落山 行行下帶馬既人問我地 加錢行第二條路 平坦 舒服些 我頂丫 你唔早講 咁我地當然接受啦 隻馬係佢 係個山頭度 咩事都會發生 加就加啦 完路都見到好多好靚既境色 最梗要係 馬係好為食 見到草就去食 食完就即刻大大 核突非常呀



*騎馬上山1

*騎馬上山2

*雲杉坪1

*雲杉坪

*氧氣

跟住下一站就去枆牛坪 跟住去到就坐大索道上去 上到去發覺比雲杉坪靚好多 大好多 好可惜 我地 只可以逗留 個多小時 因為大索道要關 我諗我地只可以行得三分一咋 所以推介朋友如果去 可以放棄雲杉坪 去枆牛坪玩算了 因為一日去 哂兩個好困難呢

*枆牛坪1

*枆牛坪2

*枆牛坪 3

跟住番麗江 又去洋人街食 今次食韓國野 咁梗係又要啤一啤呢 食完飯番去訓了 因為第三日旅程係挑戰瀘沽湖
 


第三天

瀘沽湖



*放牧完了,要回家


一大早起身本身諗住係客棧食早餐 前一晚同妹妹仔講 佢地今次有怨言 話我地食早餐 佢要好早起身 叫我地自己出去食 哈 咁都得 我地係客人 竟然佢話事 哈 不過我地好樂意 都唔想難為佢地 咁我地自己出去食(反而欣賞她們那份真 唔想就話唔想) $4 蚊就可以食碗酸辣米線 客棧旁邊就有啦 無為辛苦可愛妹妹仔啦

食飽飽出發啦 講好左昨日那包車載我地去瀘沽湖 頂丫 今日個女司機多多野講 又話自己個牌要續 搵左第二個載我地去 都決定走啦 仲可以 唯有上車 6個鐘頭有多既車程 呢個師傅唔係好出聲 悶鬼死 又唔介紹下 坐到腰骨都痛呀 佢手車就 唔錯 一個字辣 唔可以俾人爬佢頭 哈

*我們的車子,伴了好幾天

8點幾出發 下午2點幾去到了 首先我地去到觀景台 望一望瀘沽湖既全景 真係目定口呆 好似一張畫
係面前咁靚 大家都好難相信 係觀景台

*瀘沽湖

有兩個小朋友一路跟住叫我地買蘋果 又話行左三個鐘先黎到 又話無錢開學 我地見佢地咁可愛 俾左少少錢佢地 要佢地同我地影幾相


*賣蘋果的小孩

跟住真正進入瀘沽湖 開頭我地諗住住係里格 個師傅多多野講 又話差不多 車係佢 佢又唔係好友善我地又一次妥協了 最後都係住番大落水村 呢個師傅無得頂呀 去到大落水無啦啦駛入一間食府話係度食飯 我地梗係唔肯 我地就自己行出去睇下有咩食 見到有燒烤 咁就食燒烤啦 燒茄子勁正呀 第二度都食唔番呀 我地又叫左雞蛋炒飯 加個度既特別辣粉 好好食


*食燒烤,貪得意拿了食店的手動風筒玩


*他在準備晚上的燒全羊

食食下野 聽到羊叫 原來有一車羊運左黎 睇佢地好慘同同伴分開 佢地今晚就會俾人燒 瀘沽湖特色燒全羊 其實我都想試不過實左太貴 $600一隻 我地有些同伴又唔食羊 所以都無食啦 之後就搵地方今晚住啦 搵左一間都幾蚊 不過無辦法 那邊的居住環境好似無麗江咁好 一晚半晚算啦 之後就週圍行下 影下相 下午茶時間又到 走左食個麻辣米線 甜酒蛋 第一次食咩叫真正麻辣 條利真係無哂感覺 不過真係好正 甜酒蛋都唔錯 係清涼的天氣下 飲一淡都加唔少暖意


*豬槽船

*瀘沽湖旁的草坪,有人在放牧


*豬槽船

*小孩跳入湖中玩耍1

*小孩跳入湖中玩耍2

*瀘沽湖旁的小孩

*瀘沽湖旁賣蘋果的小孩

夜晚我地就參加左個溝火晚會 感受一下摩梭人既文化 (其實呢個晚會好流 好商業化 搵錢活動) 不過我地都有出去跳舞 玩下 都幾得意既

晚會完左我地又去燒烤啦 今次去左湖邊一間臨時檔口 好得意 我地一邊燒烤 那些在檔口工作的女孩唱山歌給我們聽 我又講一些摩梭文化給我們聽 我們當然問她們走婚既事啦 哈哈 呢餐食得好開心 跟住大家就買買手信 行下 台頭望上天空 嘩 咁多星既 多到好似假咁喎 真係好靚 我同基哥都啞哂 今日可能坐車坐到耐 大家都累 所以都好早訓左

 

第四天

瀘沽湖回麗江


一早起身去食個麻辣米線食早餐 跟住就上車走了 上車時要求師傅點都要去里格睇睇 幾黑人憎佢點都唔肯去 最好只去到附近 俾我地遠望里格一下就要走 跟住又坐左6個多鐘頭既車番麗江 番到麗江都成4點啦 跟住個師傅問我地第二日去邊心諗 你咁既服務態度 仲敢問 我地咪話

*遠望里格村

係麗江玩多幾日先決定囉 佢被抄魷魚了 跟住就番金虹客棧 我地叫左妹妹仔點都要留番房俾我地咖 好彩佢地都有留到 我地即刻打俾第一天 包佢車那大姐 話一定要佢帶我地香格里拉 如果唔係我地 搵個另外一個人 佢又答應了

今晚係麗江最後一晚了 大家都去買買手信 晚餐我地決定係番客棧食啦 $10一位 都幾好食 有湯 又有我地既最愛 雞蛋炒飯 飲飽食醉 大家要真真正正收拾行裝

*這晚在客棧食晚餐,四川師傅的手勢很好,食飯前和我們談了很久,說了很多他以前的事


離開麗江 進入我地雲南第二個要到既地方 香格里拉 今晚大家都好好睡了一覺呢

 

第五天

香格里拉



*遠望松贊林寺


訓醒發覺喉嚨劇痛 出事 可能食得太多燒烤 麻辣野太多 表哥有幾粒喉糖頂住先啦 大家都準備出發了 同客棧的妹妹仔道別後 就踏上我們去香格里拉既路了 今次大姐黎接我地 點知 佢又同我講 佢又唔得 今次係佢表弟帶我地去 又話表弟年紀同我地差不多 會好玩好多 又係無得選擇下 出發 點知 今次車上唔係一人 係兩人 兩個男人 開頭以為 那是師傅既朋友 去到某一個地方會落車 點知原來兩個都係師傅 話長途喎 有個拍擋會好一些 我地只可以答 哦 之後發覺呢個個師傅都幾好 沿途會講解好多好多 好似請左個導遊咁 我地對佢都幾滿意啦

去香格里拉既時候會路經長江第一灣 無咩特別 影幾張相 就走了 差不多6個小時 我們到了香格里拉 香格里拉俾我既感覺 就係一望無際既大草原 好多田 呢個係一個藏族既地方 都會見到一些藏族既建築 都幾得意 之後我地就去左食飯 由於先前用得太多錢 發覺經費唔係好夠 唯有慳住用啦 午餐又係雞蛋炒飯加幾碟青茶 師傅食既野都好過我地呢 之後我就搵左間藥房 買左
一包口含丸 醫治下我喉嚨先

香格里拉第一站景點係屬都湖 無咩特別 坐快艇出湖 車 流既 無野好玩

第二站 松贊林寺(小布達賴宮) 入去參觀下 好特別 好似真係去左西藏咁 見到好多喇嘛 我地轉轉經輪 就入左個地方 女性止步的 表嫂你無得入去了 哈哈 入到去見到好多 嘛仔 我諗係度敬拜咁 不過佢地都唔專心 見到我地係度笑 可惜入面唔俾影相 因為氣氛真係好正 真係想影幾張相呢 有樣幾得意既野 寺上既天空 真係有好多烏丫(唔記得左點寫) 我地即刻想起天葬 之後就去搵地方住啦


*松贊林寺1

*松贊林寺2

頂 司機介紹間好貴 二百幾蚊住一晚 跟住咪去第二間囉 其他既又接受唔到 最後都係去番貴那間 真慘 夜晚去左參加藏族家訪 真係好聽 去到先知完來又係一間商業晚會 $50一個人 是但啦 試下啦 去到打死都試下藏人成日飲既酥油茶 一飲即刻反胃 酥到呢 我眼水都流埋 跟住睇下藏族歌舞 我地又出去一齊跳跳舞舞 其實個晚會真係無聊到極 我地都唔識欣賞 睇左大半我地都想走左 因為想去食晚飯呢 結果我地又去左燒烤 再加碗雞蛋炒飯 食到個個都勁飽 跟住都無咩好做 番去訓啦 因為第二日要挑戰虎跳峽

*肩上披上哈達的我和藏族屋主合照


第六天

虎跳峽 大里


一大早起身 去納柏海 今次我地唔驚啦 騎馬吧了 我地今次野馬係大草原奔馳添呀 真係好大個草原玩完野馬奔馳 就坐車進入下一驚險之旅虎跳峽


*納柏海


我地今次打算挑戰既項目係途步橫越中虎跳既一線天 今次我地多左個成員 就係 其中一個師傅啦 佢話都擔心我地 所以要睇住我地 服務態度一流啦 我地請左一個阿伯帶我地橫越呢個經險之旅 一開始時好似行山咁 行下行下 就好辛苦啦 路勢都幾崎嶇 聽聞表嫂行行下好大汗 並不是因為熱而出汗 係因為緊張而出汗 你話幾恐怖 表嫂唯有硬著頭皮向前走 印象好深就係爬天梯 我地途手爬一條梯 一條見唔到底既梯 有所謂既安全帶 安全帶只是上面有人幫你捉住條繩吧了 我地係勇士 唔駛啦 死就死 爬落去 爬極都唔到底 真係驚驚地 好小心 一陣踩錯 失足 就咁玩完 結果我地都好平安 個個安全到步 其實虎跳峽風景係幾靚 可惜因為要行山 我地都唔方便影太多相 行左3個多鐘到 終於完成途步一線天 我就真係散哂啦 要快快走了 因為時間趕迫 我地今晚要趕去大里


*虎跳峽

*向下爬

*我向下爬到梯子的一半,看到其中一節樹枝斷,換了樹枝


大家係車到都累 呢程車真係增加唔少知識 康仔 基哥 勤 討論三國風雲錄 唔好意思 我無睇過三國任何文獻 我同表哥唯有聽啦 表嫂一貫作風 訓 佢係咩路行車都可以訓 佢係大師姐 勤係小師弟 因為勤都係係車好訓得 不過同大師姐比仲差好遠 三國講完 到勤講佢既情史 真係唔夠後
生黎 大佬佢幼稚園初戀邊夠佢玩呀 講下講下 又坐左成6個幾鐘了 入到大里都成夜晚十一點了 跟師傅說再見後 就係深夜既大里古城搵住既地方 跟住搵到間類似賓館既地方 安頓低 就去食我地既晚餐了 大里古城又有條洋人街 我地又係去食西餐 不過大里古城就比麗江差得遠啦 人流都少好多 食既野普通啦 西餐都係香港比較好食 大家今日真係無哂力 坐左成8 9個鐘頭車 又行埋中虎跳 大家唯有早些休息啦

 

第七天

大里 昆明火車

今日訓多左少少 因為大里都無諗住去邊度玩 9點幾先去食早餐 去左洋人街食番個歐陸式早餐 唔錯既 十幾蚊 跟住就遊洱海 睇大里三塔 完全無感覺 影幾張相就走 交功課式 最特別咪坐過馬車囉 跟住就出番大里市 買今晚坐火車去昆明既火車飛

去到買車票真係火都黎 等左成個鐘 都唔知攪咩 因為夜晚9點幾先上車 我地就去左食野 同打美式桌球消磨下時間

*大里


跟住就上火車踏上昆明既征途了 上到火車我地剛好6人一個包箱 跟住發生一個小插曲 我地每人上到車 都好興奮 因為估唔到幾十蚊都咁正 一下子諗住搵人袋番哂所有車票 死 發現唔見左張 跟住搵極都搵唔到 諗住扮傻 算啦 唔理 點知一開車 有人查飛 跟住做戲啦 扮自己都唔知車票係邊 其實大家都驚到陣 因為之前搵左 好耐都搵唔到 無飛會點呢 嘩 係最後一刻 表嫂突然間拎張飛出黎 嚇死 事後問番表嫂 佢話無啦啦見到張飛 頂 無理由呀 我地明明搵過哂所 有地方 今次真係有驚無險 同埋好明顯大家既戲真係屎到爆 整晚流流長 都唔知做咩好 玩樸克啦 我咁大個仔第一次爭住4條DEE 俾人抄13隻 真係經典 玩玩下火車熄燈 望一望錶 喂 10點咋 係咪玩野呀 問下職員攪咩 佢話因為其他人要訓覺 所以要關燈唔係掛 香港人晚餐都未消化啦 我地就用電筒照明繼續玩啦 玩到咁上下俾人投訴我地嘈 我地唯有靜啦咁 玩到咁上下 大家都有些累意 試下訓啦 今晚係我人生第一次係火車過夜 其實都OK既 不過訓下醒下咁囉
 

第8天

昆明

早上6點未夠 天都未光 就到左昆明 我地都未訓醒就好嘈 其他人好似知道要落車咁 起哂身刷牙執野 我地就車停左先起身執野 最後仲俾人趕落車 我地係最後落火車既人呢 大家都未訓醒 清晨既昆明特別涷 由於先前同康仔都去過昆明一次 所以都OK 唔驚 我地係火車站就打的去昆明市中心先 金碧廣場 大家集合左 就四圍搵地方住 我地都幾好彩搵到個地方 好近廣場的 $100
雙人標間 印像好似係昆明大酒店 伍華大廈對面 真係酒店咁 唔錯唔錯 $100係昆明市我地覺得好抵 大家係火車都訓得唔係幾好 表哥又有D 唔舒服 各自休息 聽聞表哥仲發燒添 咁表嫂就同我地食完早餐番去照顧表哥 我地就恰左一陣又出去玩了 因為之前同康仔黎過昆明 好多地方都去過 咁我地就帶基哥同勤去圓通寺

行下啦 可惜落住好大雨 都無咩心情玩 個身都濕哂 去完圓通寺 我地都決定番酒店避一避雨 給果我就好似有感冒唯有訓訓休息休息 大家都訓到咁上下 就叫埋表哥表嫂出去食晚餐 成日睇遊記 話橋香園過橋米線點正 點都要試下 我地就去左 金馬碧雞坊那間 普通啦 又唔覺得真係咁掂囉 之後表哥就同表嫂週圍行下 我地4男子 去到昆明 梗係去浦下先啦 金雞廣場都有條酒吧街有好多酒吧 我地見到有一間什麼謝霆峰 內衣SHOW 入去睇下啦 個D SHOW係幾好既 有D靚女係個台度行CATWALK 謝霆峰就... 笑死人

之後番酒店搵番表哥 交待明天基哥 勤 去石林既事 我同康仔就唔會去 因為先前去過 搞掂哂之後 我地再夜闖昆都(昆明籣桂芳) 好多人 之後就去左天籟村 一間的士高 我地無跳舞 飲下酒 睇下靚女行CATWALK 玩到點幾鐘 就番酒店了 因為基哥同勤明天要早起去石林


第9天

石林



第10天

昆明 深圳 香港

起身之後 去食早餐 又食辣既米線 最後一餐雲南早餐了 之後去左昨日同康仔亂行去到既尚義街鮮/乾花市場 去到大家都好瘋狂買手信 因為真係太平了 大家買完野之後 去左昆都食午餐 就番去收拾行裝去機場 飛番深圳了 兩點幾飛機 跟住係機場見到好多人像攝影藝術照既書賣 嘻嘻 無著衫既女仔相呢 哈哈


*昆明機場

跟住我地就離開雲南 番深圳了 大家都好唔捨得呢 番到深圳機場 包車去羅湖關口番香港 車上大家都回味今次之十天之旅 最慘係第二日大家都要番工 番學 番到屋企都9點幾10點了 番到香港既感覺好陌生咁 番到屋企 感覺都好陌生 不過都訓得著 第二朝一早起身 又要回復枯燥既上班生活 灰呀 ....

 


I HOME I GUESTBOOK I